ابوذيات عراقية2012

--------------------------------------------------------------------------------

قهر حبك حبيبي عسل وي جوز
وربك مايتوب القلب ويجوز
تريد انساك بس بالموت ويجوز
تلمنه الاخره ونرجع سويه



وحك الي بده القرأن بسمه
تركني وضاعت من شفاي بسمه
القلب ما صاح بسمي صاح بسمه
لان هوة القلب والروح اليه



اريد اكصد لعد حبك وظيفه
واحط حبي على حبك وظيفه
اذا هذا العشك صاير وظيفه
ما اطلع تقاعد للمنيه



شعر ما اكتب لغيرك واناظم
وتفضح دومك بسراي وانا ظم
الساهر ما وصف حسنك وناظم
اوصف بيش وانت الروح اليه



قلم قلبي تداين ورقه منك
وابد ماكو بجمالك وارقى منك
اسجلك انت الاول وارقمنك
واكتب لافته محجوز اليه




يروحي بمعزتك للزين شهدي
انا النحله النحيله وخلص شهدي
حرت للغالي غير الورد شهدي
الورد بس للورد يصلح هديه




روحي وياك ما كطعت وصلها
وتفرح لو خبر منك وصلها
الخوه انت معناها واصلها
وتضل رغم البعد غالي عليه



حسافه الوكت عني بعدكم
صرت ماشوف بعيوني بعدكم
اريد اسأل تحبوني بعدكم
لان حبكم يداوي الجرح الي بيه




دموع تسيل من عيني والمها
وتلوب الروح لشوفتك والمها
عذاب الروح من عندك والمها
بسبب فركاك يالغالي عليه



مفارك ليالي سنين مرن
وعلي صاير لذيذ الزاد مرن
طفر قلبي على النقال من رن
لان حسيت روحي دك عليه