يكولون تحلم بيه رجعت من جديد

خسرانه رجعت من هذيج امالها
جرحوا احساسي السولفولي احوالها
يكولون هسة عيونها وذيج الجفون
الدمع بيهن كلشي ما خلالها
يكولون تحلم بيه رجعت من جديد
الكبل ماقبلت اضل ابالها
ثروة ماعدي وكدرت انطيها روح
عمــري مـــافــكرت بستـــغلالـــهـا
الرخصتني ودورت علـ يشترون
الراحـــت وضل بالـــكلب تمثالها
يكـــولون نبرة صوتها تحس بيه خوف
وبتســامتهـا الدمع يغــتالـــها
بحلامها خطوط المخالب واضحات
موقعلــها اعلـة الحلــم جتــالها
الوادعتني وراحت لكوكب بعيد
اضاهر الكوكب رفض مــأ شالها
الماعرضتلها ولا كتلها ليش
كَلت ميخالف تروح ابفالها
العلمتنــي شلــون اكول الله كريم
الدنيا تفتر ما تضل ابحالها
الجنت اللملها الندى ولمتلي لليل
انطيتها عيوني وعصرت وشالها
الجانت تغمض بخصلت مستحاي
وجنت اخاف عيون صلفة تنالها
المثلت دور النوارس بالبياض
تلونت حتى بسواد خيالها
راحت وكلبي الترف شوفها خير
و وادعتني وسوت اليحلالها
استكثرت بيه الوفه وانا الوفيت
حسبت تالي الوكت يصفالها
اتصورت ينطون الاحلام ابلاش
تاخذ وماتنطي شي حسبالها
يكولون رجعت ضال بواهسها قيد
ماكو مفتاح الي يفك اغلالها
واني كتلهم بعد مابيه حيل
ابني يوميه قصر برمالها
كلولها ادور غصن توكف عليه
للخريف انطيته غصن الشالها
كلولها شال الهوى من الذكريات
والبقة من العشرة بس اطلالها
كلولها ادور حلم مضمونه بي
هواي الاحلام التغر اشكالها
كلولها يكول اني ناسي ومن زمان
وهيه زين اتذكرت هنيالها

للرائع ايهاب المالكي